छत्रपती शिवरायांचे शौर्य, पराक्रम आणि रयतेच्या कल्याणाचे कार्य प्रेरणादायी – विधान परिषद उपसभापती सचिन अहिर

0 2


सोयगाव येथे शिवस्मारकाचे भूमिपूजन

छत्रपती संभाजीनगर, दि.२२: छत्रपती शिवाजी महाराजांचे शौर्य, पराक्रम, स्वराज्याची संकल्पना आणि रयतेच्या कल्याणासाठी त्यांनी केलेले कार्य जगासाठी प्रेरणादायी आहे. त्यांचे विचार आणि आदर्श भावी पिढ्यांपर्यंत पोहोचविण्यासाठी सोयगाव येथे उभारण्यात येणारे शिवस्मारक प्रेरणास्थान ठरेल, असे प्रतिपादन महाराष्ट्र विधान परिषदेचे उपसभापती सचिन अहिर यांनी आज केले.

सोयगाव नगरपंचायतीच्या वतीने उभारण्यात येणाऱ्या छत्रपती शिवाजी महाराज स्मारकाचा भूमिपूजन सोहळा आज विधान परिषदेचे उपसभापती सचिन अहिर यांच्या हस्ते करण्यात आला. आमदार अब्दुल सत्तार यांची यावेळी प्रमुख उपस्थिती होती.

सिल्लोडचे नगराध्यक्ष अब्दुल समीर अ. सत्तार, सोयगाव नगराध्यक्ष आशाबी तडवी, डॉ. मनोज राठोड, प्रभाकर काळे, धरमसिंग चव्हाण, केशवराव तायडे, जिल्हा बँकेचे संचालक अर्जुन पा. गाढे, कृषी उत्पन्न बाजार समितीचे सभापती सतीश ताठे, संचालक नंदकिशोर सहारे, डॉ. दिनेश साळवे, दामू अण्णा गव्हाणे, सयाजीराव वाघ, कुणाल राजपूत, संतोष बोडखे, अक्षय काळे, नगरसेवक शेख रऊफ, हर्षल काळे, राजू दुतोंडे, दीपक पगारे, संदीप सुरडकर, अक्षय इंगळे, कादिर शहा, नारायण घनगाव, गजानन कुडके, लतीफ शहा, भगवान जोहरे, संध्याताई मापारी, अशोक खेडकर, पंचायत समिती सदस्य सोपान गवांडे, मुख्याधिकारी संभाजी देशमुख, प्रशांत शिरसागर, गोपीचंद जाधव, राजमल पवार, बाबू चव्हाण, सलीम पठाण यांच्यासह नागरिक मोठ्या संख्येने उपस्थित होते.

उपसभापती सचिन अहिर म्हणाले की, छत्रपती शिवाजी महाराजांचे कार्य कोणत्याही एका समाजापुरते मर्यादित नसून समाजातील प्रत्येक घटकासाठी प्रेरणादायी आहे. त्यांनी प्रतिकूल परिस्थितीत स्वराज्याची स्थापना करताना दाखविलेले धैर्य, दूरदृष्टी, शौर्य आणि रयतेप्रती असलेली बांधिलकी आजही आदर्शवत आहे. महिलांचा सन्मान, सर्वधर्मसमभाव आणि न्यायनिष्ठ राज्यकारभार ही त्यांची शिकवण नव्या पिढीपर्यंत पोहोचणे आवश्यक आहे.

आमदार अब्दुल सत्तार म्हणाले की, सोयगाव तालुक्याची १९५३ मध्ये स्थापना झाल्यापासून छत्रपती शिवाजी महाराजांचे स्मारक उभारण्याची मागणी जवळपास पन्नास वर्षांपासून होत होती. उपमुख्यमंत्री एकनाथराव शिंदे यांनी या प्रस्तावासाठी विशेष लक्ष घालून स्मारकासाठी अडीच कोटी रुपयांचा निधी उपलब्ध करून दिला. हे स्मारक सोयगावच्या वैभवात भर घालण्यासोबतच जगप्रसिद्ध अजिंठा लेणी पाहण्यासाठी येणाऱ्या देश-विदेशातील पर्यटकांसाठीही आकर्षणाचे आणि प्रेरणेचे केंद्र ठरेल, असा विश्वास त्यांनी व्यक्त केला.

आत्महत्याग्रस्त  शेतकरी कुटुंबांना मदत

सोयगाव येथील  या कार्यक्रमादरम्यान तालुक्यातील चार शेतकरी आत्महत्याग्रस्त कुटुंबांना प्रत्येकी एक लाख रुपयांची शासकीय आर्थिक मदत वितरित करण्यात आली. तसेच कुटुंबांतील महिलांना शिलाई मशीन, कुटुंबातील मुलीला शिक्षणासाठी सायकल आणि जीवनावश्यक किराणा साहित्य देऊन मदत करण्यात आली.

सूत्रसंचालन प्रशांत जोशी आणि ॲड.योगेश पाटील यांनी केले. प्रास्ताविक प्रभाकर काळे यांनी व  संतोष बोडखे यांनी उपस्थितांचे आभार मानले.

००००

- Advertisement -

Leave A Reply

Your email address will not be published.