आंतरराष्ट्रीय तायक्वांदो स्पर्धेतून महाराष्ट्राच्या खेळाडूंना जागतिक संधी- उपमुख्यमंत्री सुनेत्रा अजित पवार

२० देशांतील खेळाडू सहभागी, मुलींना क्रीडाक्षेत्रात प्रोत्साहन देण्याचे आवाहन
पुणे, दि. २२ : तायक्वांदो हा केवळ पदक मिळविण्याचा खेळ नसून शारीरिक ताकदीसोबत मानसिक शिस्त, संयम, एकाग्रता, आत्मविश्वास आणि प्रतिस्पर्ध्याबद्दल आदर शिकवणारा खेळ आहे. आंतरराष्ट्रीय स्पर्धांमुळे महाराष्ट्रातील खेळाडूंना जागतिक दर्जाच्या खेळाडूंसोबत घरच्या मैदानावर खेळण्याची संधी मिळत असून, अशा स्पर्धांना राज्य सरकारचे नेहमीच सहकार्य राहील, असे प्रतिपादन उपमुख्यमंत्री सुनेत्रा अजित पवार यांनी केले.

बालेवाडी येथील श्री शिवछत्रपती क्रीडा संकुलात आयोजित इंडिया इंटरनॅशनल ओपन तायक्वांदो चॅम्पियनशिप २०२६ च्या उद्घाटन समारंभात त्या बोलत होत्या. २० ते २६ नोव्हेंबरदरम्यान सात दिवस चालणाऱ्या या जी-१ दर्जाच्या आंतरराष्ट्रीय स्पर्धेत २० देशांतील खेळाडू, प्रशिक्षक आणि प्रतिनिधी सहभागी झाले आहेत.

या उद्घाटन समारंभास आशियाई तायक्वांदो संघटनेच्या उपाध्यक्ष नॅन्सी अदनान हसन अल-हिंद (जॉर्डन), फराज अल्फथेल (कुवेत), इस्माईल मोसी (इजिप्त), सुरज कश्यप सिंह (दिल्ली), राज्याचे क्रीडा आयुक्त दीपक सिंघल, भारतीय तायक्वांदोचे अध्यक्ष नामदेव शिरगावकर, भारतीय तायक्वांदोचे संचालक ली जँग ही, आयोजक डॉ. रजत दीक्षित, पवनसिंग जी, नगरसेवक अमोल बालवडकर, सुमेध मगर, पूनम विधाते, श्री.गनात्रा तसेच तायक्वांदो क्षेत्रातील मान्यवर संग्रामसिंग आदी उपस्थित होते.
छत्रपती शिवाजी महाराजांनी महाराष्ट्राला शौर्य, शिस्त आणि स्वाभिमानाचे संस्कार दिले. आज क्रीडांगणावर उतरणाऱ्या खेळाडूंमध्येही हेच गुण दिसून येतात. या स्पर्धेच्या निमित्ताने दिवंगत अजितदादांची आठवण होत असून, त्यांनी महाराष्ट्र ऑलिम्पिक असोसिएशनचे अध्यक्ष म्हणून अनेक वर्षे काम करत खेळाडूंना संधी आणि सुविधा मिळाव्यात यासाठी सातत्याने पाठबळ दिले. महाराष्ट्रात अशी आंतरराष्ट्रीय स्पर्धा होताना त्यांना निश्चितच आनंद झाला असता, अशा शब्दांत त्यांनी श्रद्धांजली अर्पण केली.
पुणे हे शिक्षणाचे माहेरघर म्हणून ओळखले जाते, तसेच क्रीडाक्षेत्रातही शहराचे महत्त्व मोठे आहे. २००८ च्या राष्ट्रकुल युवा क्रीडा स्पर्धेपासून बालेवाडी क्रीडा संकुलात अनेक राष्ट्रीय व आंतरराष्ट्रीय स्पर्धा झाल्या असून, या स्पर्धेमुळे त्या परंपरेत आणखी एक मानाचा अध्याय जोडला जात आहे, असे त्या म्हणाल्या.
मुलींना खेळासाठी प्रोत्साहन द्या
तायक्वांदोमुळे मुलींना स्वसंरक्षणाचे बळ मिळते, त्यांच्यात आत्मविश्वास निर्माण होतो. मैदानावर धैर्याने उभ्या राहणाऱ्या मुली जीवनातील आव्हानांनाही तितक्याच धैर्याने सामोरे जाऊ शकतात. राजमाता जिजाऊ आणि महाराणी ताराराणींच्या पराक्रमाचा वारसा लाभलेल्या महाराष्ट्रातील मुली आज आंतरराष्ट्रीय मैदानावर देशाचे नाव उंचावत आहेत. त्यामुळे पालकांनी आपल्या मुलींना खेळण्यासाठी प्रोत्साहन द्यावे, त्यांच्या स्वप्नांना बळ द्यावे आणि त्यांना आवश्यक पाठबळ द्यावे, असे आवाहन त्यांनी केले.
जिंकणे महत्त्वाचे असले, तरी खिलाडूवृत्ती त्याहून मोठी आहे. आज पराभूत झालेला खेळाडू उद्या विजयासाठी नव्या तयारीने उभा राहतो. हीच खेळाची खरी ताकद आहे. जिल्हास्तरीय स्पर्धांमधून ग्रामीण आणि शहरी भागातील मुलांना आपले कौशल्य दाखविण्याची संधी मिळत असून, त्यातून प्रतिभावान खेळाडू पुढे येत आहेत.
मुख्यमंत्री देवेंद्र फडणवीस यांच्या नेतृत्वाखालील शासन खेळाडूंना चांगल्या सुविधा, दर्जेदार प्रशिक्षण आणि आंतरराष्ट्रीय स्पर्धांचा अनुभव मिळावा यासाठी कटिबद्ध आहे. ग्रामीण भागातील सर्वसामान्य कुटुंबांतील मुलांमध्येही मोठी गुणवत्ता असून, ती शोधून योग्य संधी उपलब्ध करून देणे ही सरकारची जबाबदारी आहे. राज्यात अशा आंतरराष्ट्रीय स्पर्धांच्या आयोजनाला शासनाचे सहकार्य कायम राहील, अशी ग्वाही त्यांनी दिली.
स्पर्धेत सहभागी सर्व खेळाडूंना शुभेच्छा देत, या स्पर्धेत उत्तम खेळ, नवे विक्रम आणि देश-विदेशातील खेळाडूंमध्ये मैत्रीचे नवे बंध निर्माण होतील, असा विश्वास त्यांनी व्यक्त केला.
००००

