
धुळे, दि. 22 : ज्या आई-वडिलांनी आपल्या मुलाला अभिमानाने देशसेवेसाठी पाठवले, त्याच मुलाच्या आठवणींना आज अश्रूंनी उजाळा देण्याची वेळ त्यांच्यावर आली आहे. अवघ्या 25 व्या वर्षी कर्तव्य बजावताना वीरमरण आलेल्या धुळे तालुक्यातील रामी गावचे सुपुत्र, भारतीय सैन्यदलाचे वीरजवान जयेश माळी यांच्या घरी आज राज्याचे पणन व राजशिष्टाचार मंत्री तथा जिल्ह्याचे पालकमंत्री जयकुमार रावल यांनी सांत्वनपर भेट दिली. आपल्या लाडक्या मुलाच्या आठवणींनी व्याकूळ झालेल्या आई-वडिलांचे सांत्वन करताना त्यांनी त्यांच्या दुःखात सहभागी होऊन धीर दिला.

मणिपूर येथे 18 नोव्हेंबर रोजी सैन्य वाहनाच्या दुर्दैवी अपघातात जयेश माळी यांना वीरमरण आले. देशसेवेसाठी घराबाहेर पडलेला आपला मुलगा आता पुन्हा कधीच परतणार नाही, ही वेदना माळी कुटुंबीयांसाठी असह्य आहे. ज्या घरात जयेश यांच्या उज्ज्वल भविष्याची स्वप्ने पाहिली जात होती, त्या घरात आज त्यांच्या आठवणी उरल्या आहेत. पालकमंत्री जयकुमार रावल यांनी कुटुंबीयांची आस्थेवाईकपणे विचारपूस करत त्यांना आधार दिला.

यावेळी पालकमंत्री पालकमंत्री जयकुमार रावल म्हणाले की, आई-वडिलांसाठी आपले मूल म्हणजे संपूर्ण आयुष्य असते. वीरजवान जयेश माळी यांच्या जाण्याने त्यांच्या आयुष्यात निर्माण झालेली पोकळी कधीही भरून निघणार नाही. या दुःखापुढे सांत्वनाचे शब्दही अपुरे आहेत. मात्र, माळी कुटुंबीयांनी स्वतःला एकटे समजू नये. संपूर्ण धुळे जिल्हा त्यांच्या दुःखात सहभागी असून, शासन आणि प्रशासन त्यांच्या पाठीशी खंबीरपणे उभे आहे.
“ज्या वयात तरुण आपल्या आयुष्याची स्वप्ने पाहतात, त्या वयात जयेश यांनी मातृभूमीच्या सेवेला सर्वोच्च स्थान दिले. त्यांच्या आई-वडिलांनी आपला लाडका मुलगा गमावला, तर देशाने एक शूर आणि कर्तव्यनिष्ठ जवान गमावला आहे. जयेश यांचे बलिदान देश कधीही विसरणार नाही. त्यांची देशसेवा आणि त्याग पुढील पिढ्यांसाठी सदैव प्रेरणादायी राहील,” अशा भावपूर्ण शब्दांत पालकमंत्री पालकमंत्री जयकुमार रावल यांनी वीरजवान जयेश माळी यांच्या स्मृतींना अभिवादन केले.
यावेळी मुंबई कृषी उत्पन्न बाजार समितीचे सदस्य रावसाहेब गिरासे, उपविभागीय अधिकारी रोहन कुवर, तहसीलदार अरुण शेवाळे, ग्राम महसूल अधिकारी अंकुश भैरट, राम भदाणे, अरविंद जाधव, प्रवीण बोरसे, बाळू सानप, माजी जि.प. अध्यक्षा धरती देवरे, यांच्यासह स्थानिक पदाधिकारी व ग्रामस्थ उपस्थित होते.
००००

