जिल्हास्तरीय संनियंत्रण समिती बैठक; टंचाई निवारणाच्या कामांना प्राधान्य द्यावे- पालकमंत्री संजय शिरसाट

छत्रपती संभाजीनगर,दि. ८ – दुष्काळाच्या पार्श्वभुमिवर जिल्ह्यात टंचाई निवारणाच्या कामांना प्राधान्य द्यावे. त्यात चारा पीक लागवड, गाळ काढणे व तो शेतकऱ्यांच्या शेतात टाकणे, पाणी पुरवठा, शेतकऱ्यांना मदत, शेतमजूरांना मदत व रोजगार उपलब्धता अशा कामांना प्राधान्य द्यावे, असे निर्देश राज्याचे सामाजिक न्याय तथा जिल्ह्याचे पालकमंत्री संजय शिरसाट यांनी आज दिले.

दुष्काळी स्थितीच्या पार्श्वभुमिवर आज पालकमंत्री शिरसाट यांनी जिल्हास्तरीय संनियंत्रण समितीच्या बैठकीत दुष्काळ निवारण उपाययोजनांचा आढावा घेतला. जिल्हाधिकारी विनय गौडा जी.सी., जिल्हा परिषदेच्या मुख्य कार्यकारी अधिकारी मिन्नू पी.एम., अति. आयुक्त श्रीमती कल्पिता पिंपळे, निवासी उपजिल्हाधिकारी जनार्दन विधाते, अधीक्षक अभियंता तथा प्रशासक लाभक्षेत्र विकास प्राधिकरण राजेंद्र धोडपकर, कार्यकारी अभियंता पाटबंधारे  एस.जी. शहापूरे, कार्यकारी अभियंता जायकवाडी  पाटबंधारे विभाग गणेश हासे, कार्यकारी अभियंता नांदुर मध्यमेश्वर  पाटबंधारे विभाग प्रवीण पाबळे,  उपकार्यकारी अभियंता लघु पाटबंधारे विभाग रुपेश हिरे,  कार्यकारी अभियंता मृद व जलसंधारण जि.प.आनंद रुपनर,  कार्यकारी अभियंता मृद व जलसंधारण नरेंद्र कटके, शहर अभियंता संजय कोंबडे आदी उपस्थित होते.

पालकमंत्री शिरसाट यांनी  सुरुवातीला जिल्ह्यात उपलब्ध पाणी साठा, चारा उपलब्धतेबाबत आढावा घेतला. जिल्ह्यात चारा बाहेरुन आणावा लागणार नाही याची दक्षता घेत चारा उत्पादनाला चालना देण्यात यावी. त्यासाठी चारा उत्पादक शेतकऱ्यांना वैरण विकास कार्यक्रमातून अनुदान देता येईल. कालव्या लगतच्या शेतकऱ्यांना प्रोत्साहित करुन चारा पिकांची लागवड करावी,असे त्यांनी सांगितले.

जिल्हाधिकारी विनय गौडा जी.सी. यांनी सांगितले की, गंगापूर तालुक्यात गोदावरी नदी काठी तसेच धरणांच्या बॅकवॉटर क्षेत्रातील भागात चारा लागवड करता येईल. जिल्ह्यातील मुरघास उत्पादकांना चारा देऊन मुरघास स्वरुपात पशुखाद्य सुरक्षितता करता येईल.

पालकमंत्री शिरसाट म्हणाले की,आवश्यकता भासल्यास शेजारच्या जिल्ह्यांना चारा देता आला पाहिजे. निधी खर्च करतांना टंचाई उपाययोजनांना प्राधान्य द्यावे. सुरु असलेल्या कामांची क्षेत्रभेट झाली पाहिजे. दैनंदिन , साप्ताहिक अहवाल देऊन आढावा घेतला जावा. दुष्काळ निवारण कामे व मदत यात स्वयंसेवी संस्थांचा सहभाग आणि उद्योगांच्या सामाजिक उत्तरदायित्व निधीचा वापर करण्यात यावा. संस्थांना व उद्योगांना बोलावून त्यांच्याकडून मदत प्राप्त करावी. मिळणाऱ्या आणि वितरीत होणाऱ्या मदत निधी व वस्तूंसाठी एक नियंत्रण कक्ष तयार करावा. टॅंकर्सच्या वाहतुकीवर जीपीएसच्या माध्यमातून निरीक्षण व जिल्हा मुख्यालयातून नियंत्रण ठेवण्याची यंत्रणा सुसज्ज करावी. पाण्याची आवर्तने, पाणी वितरण याचे सुयोग्य वेळापत्रक तयार करावे. गाळ काढण्याच्या कामास प्राधान्य देऊन तो गाळ शेतकऱ्यांच्या शेतात विनामूल्य पोहोचवावा. शेतमजूरांसाठी स्थानिक पातळीवरच रोजगाराची कामे उपलब्ध करावीत,असे निर्देश पालकमंत्री शिरसाट यांनी दिले. दिवाळीच्या आधी शेतकऱ्यांना मदत मिळाली पाहिजे यादृष्टिने नियोजन करावे. राज्यात आदर्शवत ठरावे असे टंचाईमुक्ती उपाययोजनांचे काम आपल्या जिल्ह्यात व्हावे,असेही त्यांनी यंत्रणेला सांगितले.

०००००